Kryeparlamentarja Lindita Nikolla ka uruar të dielën të gjithë punëtorët me rastin e 1 majit, Ditës Ndërkombëtare të Punës.
Përmes një postimi në Facebook, Nikolla shkruan se historia e vërtetë e Shqipërisë është ajo e njerëzve të punës, që lodhen dhe kontribuojnë derisa dalin në pension.
Gjithashtu, kryeparlamentarja Nikolla shkruan se sa me të denja të jenë kushtet e punës dhe paga a punëtorëve, aq më e fortë bëhet ekonomia.
Urimi i Lindita Nikollës:
Sot është Dita Ndërkombëtare e Punës, dita e mirënjohjes ndaj punëtorëve. Atyre që ditë pas dite, në heshtje, me mundin, durimin dhe talentin e tyre, ndërtojnë jetën e familjeve dhe të ardhmen e fëmijëve.
Historia e vërtetë e Shqipërisë është historia e njerëzve të punës. Që lodhen, kontribuojnë dhe dalin në pension, duke u trashëguar brezave shembullin e tyre. Që me modelin e tyre të të punuarit e të jetuarit me nder, i japin jetë Shqipërisë.
Prandaj, sa më të denja të jenë kushtet e punës dhe paga e punëtorëve, aq më e fortë bëhet ekonomia. Sa më i fortë të jetë dhe sa më shumë të dëgjohet zëri i tyre, aq më e drejtë bëhet shoqëria. Si legjislatore dhe Kryetare e Kuvendit, sot ndjehem më shumë e detyruar, për ligje më të mira për njerëzit, botën e punës dhe nevojat e familjeve punëtore.
Përballë njerëzve të punës, që krijojnë të mirat për familjet e tyre dhe për Shqipërinë, përgjegjësia jonë shumëfishohet.
